काठमाडौँ– प्रधानमन्त्री शेरबहादुर देउवाले हाल महामारीका रुपमा देखा परेका रोगको नियन्त्रणका लागि सरकार गम्भीर भएर लागिरहेको बताए । 

मंगलबार काठमाडौंमा नेपाल चिकित्सक संघले आयोजना गरेको दोस्रो राष्ट्रिय स्वास्थ्य सम्मेलन उद्घाटन गर्दै प्रधानमन्त्री देउवाले स्वास्थ्य पूर्वाधारहरूको उचित व्यवस्था गर्दै महामारीका रुपमा देखिएको कोरोना र डेंगी रोगको निणन्त्रणका लागि सरकार गम्भीर भएर लागेको बताएका हुन् । 

उनले कोरोना र डेंगी रोगबाट ज्यान गुमाएकाहरूप्रति श्रद्धाञ्जली अर्पण गर्दै बिरामीहरूको स्वास्थ्यलाभको कामना गरे । उनले रोग नियन्त्रणका लागि सबै चिकित्सकहरूको सरकारलाई साथ हुने विश्वास व्यक्त गरे ।  प्रधानमन्त्री देउवाले स्वास्थ्य सम्मेलनले निकाल्ने निष्कर्ष स्वास्थ्य क्षेत्रका लागि महत्वपूर्ण हुने धारणा राखे ।

दुई दिनसम्म चल्ने सम्मेलनमा देशभरबाट पाँच सयभन्दा बढीको सहभागिता रहेको रहेको संघले जानकारी दिएको छ ।