काठमाडौँ- युरेनियम जस्तो देखिने पदार्थसहित दुई वटा गिरोहका १५ जनालाई प्रहरीले पक्राउ गरेको छ ।

छुट्टाछुट्टै स्थानबाट दुईवटा समूहलाई प्रहरीले पक्राउ गरेको हो । विक्रीका लागि आएकाहरुलाई विराटनगरको दुई स्थानबाट पक्राउ गरिएको जिल्ला प्रहरी कार्यालय मोरङले जनाएको छ ।

गत साउन १ गते एक किलो ८७ दशमलव ३ ग्रामसहित विराटनगर– ९ ट्राफिक चोकबाट ८ जना र साउन ३ गते विराटनगर महानगरपालिका– ३ स्थित दूध फारम नजिकैबाट ९ सय ७ दशमलव ६ ग्रामसहित सात जनालाई पक्राउ गरिएको जनाएको हो ।

उनीहरुको साथबाट बरामद भएको वस्तु परीक्षणका लागि पठाइएको र मुख्य नाइकेको खोजी भइरहेको छ । पक्राउ परेकाहरुलाई नियन्त्रणमा लिएर अनुसन्धान गरिरहेको जिल्ला प्रहरी कार्यालय मोरङका प्रहरी उपरीक्षक शान्तिराज कोइरालाले बताए ।