काठमाडौँ– आवश्यक वैधानिक अनुमतिबिना र स्थानीय अभियानकर्मीहरुको चर्को विरोधका बावजुद युरोपेली मुलुक बोस्निया हर्जगोभिनामा चिनियाँ कम्पनीले जलविद्युत परियोजना अघि बढाउने भएको छ ।

सन् २०१९ मा बोस्निया हर्जगोभिनाको स्वशासित क्षेत्र रिपब्लिका स्रप्स्काका प्रधानमन्त्री राडोभान भिस्कोभिचले यस परियोजनासम्बन्धी सम्झौतामा चीनको राज्य सञ्चालित नेशनल एरो–टेक्नोलोजी इन्टरनेशनल इन्जिनियरिङ कर्पोरेशनसँग हस्ताक्षार गरेका थिए । यो परियोजनाको लागत १० करोड ७० लाख अमेरिकी डलर रहेको छ ।

प्रस्तावित परियोजना बोस्निया हर्जगोभिनामा सर्ब जातिको बाहुल्यता रहेको क्षेत्र भएर बगने बिस्ट्रिका नदीमा निर्माण गरिने योजना छ । यद्यपि अभियानकर्मीहरुले भने यो परियोजनासँग आवश्यक वातावरणीय अनुमती नभएको भन्दै यसको विरोध गर्दै आएका छन् ।

उनीहरुका अनुसार यस परियोजनाले नदी र आसपासका क्षेत्रमा प्रतिकूल वातावरणीय प्रभाव पार्नेछ ।

‘हामीले यसबारेको अध्ययन प्रतिवेदन हेरेका छौँ ।’ परियोजना निर्माण गर्न लागिएको बान्या लुका क्षेत्रमा सक्रिय पर्यावरणसम्बन्धी संस्था सेन्टर फर द इन्भारोन्मेन्टकी प्रमुख येलेना इभानिचले रेडियो फ्रि युरोपलाई भनिन्, ‘यो निकै विवादस्पद छ ।’

उनका अनुसार उक्त प्रतिवेदनमा आवश्यक तथ्यांक पनि समावेश गरिएको छैन । यसबाहेक यस परियोजनालाई तयारी कार्य मात्रै गर्ने अनुमति प्राप्त छ ।

पछिल्लो समय चीनले बोस्निया हर्जगोभिनासहित दक्षिणी युरोपको बाल्कन क्षेत्रमा आफ्नो प्रभाव विस्तार गरिरहेको बताइएको छ ।

सन् २०२१ मा बुल्गेरियामा रहेको सेन्टर फर स्टडी अफ डेमोक्रेसी नामक संस्थाले गरेको अध्ययनमा बोस्निया हर्जगोभिनासहित हंगेरी, मोन्टेनेग्रो, सर्बियाजस्ता मुलुकमा चिनियाँ पुँजी भित्रिएसँगै ती मुलुकको व्यवसायिक वातावरण खस्किँदै गएको र विधिको शासनमा पनि ह्रास आएको पाइएको थियो ।