काठमाडौँ- अन्य कम्पनीको ट्रेडमार्क प्रयोग गरी पानीको जार बेच्ने २ जनालाई प्रहरीले पक्राउ गरेको छ । अरु कम्पनीको ट्रेडमार्क प्रयोग गरी पानीको जार बेचेको आरोपमा प्रहरीले सर्लाही लालबन्दीका आशिष कार्की र चितवन रत्ननगरका किरण श्रेष्ठलाई पक्राउ गरेको हो ।

उनीहरुको सथबाट दुईवटा डीआई गाडी र १९७ वटा पानीको जार समेत बरामद गरेको प्रहरीले जानकारी दिएको छ ।

काठमाडौँको कलंकी सडक खण्डमा उनीहरुले अन्य कम्पनीको ट्रेडमार्क रहेको पानी बिक्री गरिरहेको सूचनाका आधारमा उनीहरुलाई पक्राउ गरिएको प्रहरीले जनाएको छ ।

पक्राउ परेका व्यक्ति एवम् बरामद सामानहरुलाई आवश्यक अनुसन्धान एवम् थप कारवाहीका लागि वाणिज्य आपूर्ति तथा उपभोक्ता हित संरक्षण विभाग पठाइएको प्रहरीको भनाइ छ ।