एजेन्सी– रुसले युक्रनमाथि गरेको अतिक्रमणको विरोधस्वरूप विम्बल्डन २०२२ मा रुसी र बेलारुसी खेलाडीलाई सहभागिताबाट वञ्चित गरिएको छ ।

पुरुषतर्फ विश्व वरियतामा दोस्रो स्थानका रुसी खेलाडी डेनियल मेदवेदेव र महिलातर्फ विश्व वरियतामा चौथो स्थानका अरिना साबालेन्का यसबाट प्रभावित भएका छन् ।

राष्ट्रिय झण्डाबिना दुवै राष्ट्रका खेलाडीलाई भाग लिने प्रावधान तय गरिएको छ ।

विम्बल्डन जुन २७ देखि १० जुलाईसम्म संचालन हुनेछ । अल इङल्याण्ड लन टेनिस एईएलटीसीले यसबारे बुधबार आधिकारिक रूपमा निर्णय गर्ने भएको छ ।

साबालेन्का गत वर्षको सेमिफाइनल पुग्न सफल भएकी थिइन् । मेदवेदेव भने चौथो चरण पुग्न सफल भएका थिए ।

विश्व वरियतामा १५ औँ स्थानमा रहेकी रुसी खेलाडी अनास्तासिया पाभ्ल्युचेन्कोभा र बेलरुसकी १८ औँ स्थानमा रहेकी भिक्टोरिया अजारेन्काले मौका गुमाउने भएका छन् ।

पुरुषतर्फ रुसका एन्ड्रे रब्लेब आठौँ स्थानमा छ भने करेन खाचानोभ २६ औँ स्थानमा रहेका छन् ।