जनकपुरधाम– सत्ता गठबन्धनले जनकपुरधाम उपमहानगरपालिकामा जसपाका नेतालाई मेयरको उम्मेदवार बनाउने निर्णय गरेपछि नेपाली कांग्रेसका नेता तथा कार्यकर्ताले विरोध प्रदर्शन गरेका छन् ।

केन्द्रीय गठबन्धनको निर्णय आएलगतै नेपाली कांग्रेसका नेता तथा कार्यकर्ताले जनकपुरधाममा विरोध प्रदर्शन गरेका हुन् ।

केन्द्रमा गठबन्धनले गरेको निर्णयलाई आफूहरूले नमान्ने नेपाली कांग्रेस जनकपुरधामका नगर सभापति तथा मेयरका आंकाक्षी मनोज साहले चेतावनी दिएका छन् ।

नेपाली कांग्रेसलाई आघात गर्ने हिसाबले निर्णय गरिएको भन्दै उनले यो निर्णयको निन्दा गर्नुका साथै कडा विरोध गर्ने पनि उनले चेतावनी दिएका छन् ।

साहले यो निर्णयविरुद्ध वडा समिति, नगर समिति, क्षेत्रीय समिति सबै आक्रोशित रहेको पनि दाबी गरे ।

उनले जिल्लामा उपलब्ध शीर्ष नेताहरूसँग छलफल गरेर आगामी रणनीति तयार गर्ने र गठबन्धनको विरोधमा उत्रिनेसमेत चेतावनी दिए ।