काठमाडौँ- अभिनेता सौगात मल्लले एक वेब सिरिजका लागि समय दिइरहेका छन् । यसैले गर्दा उनले झन्डै १० महिनाको समय सिरिजको लागि छुट्याएका छन् । अंग्रेजी भाषामा निर्माण हुने सिरिजको लागि केही अडिसन समेत उनले गरिसकेका छन् । ‘सिरिजको लागि प्रक्रिया मै छु । केही चरणको अडिसन समेत भइसकेको छ । तर, पक्का भने होइन’ सौगातले एक भेटमा बताए ।

एक अवार्ड समरोहमा भाग लिन पुगेका सौगातले सिरिजलाई पक्का भयो भने अन्य निर्माताहरुलाई असर नगरोस् भनेर नै नयाँ फिल्म फागुन अगाडि नगर्ने भनेको स्वीकारे । अंग्रेजी सिरिजले सौगातसँग लामो समय मागेका कारण उनले नयाँ निर्मातालाई फागनुपछि मात्र सम्पर्क गर्न आग्रह गर्न थालेका हुन् । सौगातले केही दिनअघि अंग्रजी भाषामा बन्ने नेपाली फिल्ममा पनि खेल्ने चर्चा थियो तर पारिश्रमिकमा कुरा नमिलेपछि सौगातले त्यो फिल्म छाडेका हुन् । उनले यो फिल्म नगरेपछि ‘दुई नम्बरी’ साइन गरेका थिए ।

यो फिल्मको पोखरामा धमाधम सुटिङ भइरहेको छ । सौगातले छिट्टै नै यो फिल्मको सेट ज्वाइन गर्दैछन् । अंग्रेजी सिरिजका लागि नेपालको कास्टिङ एजेन्सीले दयाहाङ राईलाई प्रक्रियामा सामेल गराउन खोजेको थियो । तर, दयाले भने आफूसँग समय नभएकाले अडिसनतिर लाग्न नभ्याउने जवाफ दिएका थिए ।