काठमाडौँ– स्थानीय तह चुनावको आचारसंहिताविरुद्ध रिट निवेदन परेको छ ।

सिन्धुपाल्चोकको हेलम्बु गाउँपालिकाका अध्यक्ष निमा ग्याल्जेन शेर्पाले निर्वाचनको आचारसंहिताविरुद्ध सर्वोच्च अदालतमा रिट निवेदन दिएका हुन् ।

स्थानीय चुनावमा उम्मेदवार बन्नका लागि बहालवाला जनप्रतिनिधिले पहिला राजीनामा दिनुपर्ने प्रावधानप्रति असन्तुष्टि जनाउँदै अध्यक्ष शेर्पाले सर्वोच्चमा निवेदन दर्ता गराउन पुगेका छन् ।
उनले यो प्रावधान सच्याउन माग गरेका छन् ।

चुनाव अघि नै जनप्रतिनिधिले राजीनामा दिँदा स्थानीय तह रिक्त हुने र जनताले सेवा पाउन नसक्ने शेर्पाको तर्क छ ।

उनले यो प्रावधान संविधानविपरीत रहेको दाबी गर्दै वैकल्पिक व्यवस्था गर्न वा आचारसंहिता संशोधन गर्न पनि माग गरेका छन् ।

यता, सर्वोच्च अदालतका प्रवक्ता विमल पौडेलले शेर्पाले निवेदन दिएको भए पनि रिट दर्ता हुन बाँकी रहेको जानकारी दिएका छन् । यो निवेदन दर्ता गर्ने/नगर्ने विषयमा सोमबार निर्णय हुने पनि उनले जानकारी दिएका छन् ।