काठमाडौँ– अफगानिस्तानमा अल्पसङ्ख्यक हजारा समुदायविरुद्ध जारी दमनविरुद्ध पाकिस्तानमा प्रदर्शनको आयोजना गरिएको छ ।

पाकिस्तानको बलुचिस्तान प्रान्तको राजधानी क्वेटामा हजारा समुदायका मानिसहरुले अफगानिस्तानमा हजाराविरुद्ध जारी दमनको विरोधमा प्रदर्शनको आयोजना गरेको पाकिस्तानबाट प्रकाशित हुने डन अखबारको अनलाइन संस्करणले जनाएको छ ।

अफगानिस्तानमा अल्पसङ्ख्यक शिया सम्प्रदायका हजारा समुदायलाई लक्षित गरी बेलाबेला आक्रमणहरु हुँदै आएका छन् । केही समयअघि राजधानी काबुलमा गराइएको आत्मघाती बम आक्रमणमा ५२ जनाको मृत्यु भएको थियो । मारिनेमा अधिकांश हजारा समुदायका विद्यार्थीहरु रहेको जनाइएको छ ।

प्रदर्शनमा हजारा समुदायका नेताहरु, इस्लामिक नेताहरु, नागरिक समुदायका सदस्य एवम् आम सर्वसाधारणको उपस्थित रहेको डनले जनाएको छ । उनीहरुले अफगानिस्तानमा हजाराविरुद्ध जातीय नरसंहार भइरहेको भन्दै त्यसलाई तत्काल रोक्न माग गरेको बताइएको छ ।