काठमाडौँ- संयुक्त राष्ट्रसङ्घका महासचिव एन्टोनियो गुटेरेस दुई दिने औपचारिक भ्रमणका क्रममा भारत पुगेका छन् । महासचिव गुटेरेस मङ्गलबार राति भारत आइपुगेको भारतीय विदेश मन्त्रालयका एक अधिकारीले बुधबार बताएका छन् ।

महासचिव गुटरेसलाई छत्रपति शिवाजी अन्तर्राष्ट्रिय विमानस्थलमा संयुक्त राष्ट्रसङ्घका लागि भारतका स्थायी प्रतिनिधि रुचिरा कम्बोजलगायत अन्य अधिकारीले स्वागत गरेका थिए ।

जनवरी २०२२ मा आफ्नो दोस्रो कार्यकाल सुरु गरेपछि महासचिव गुटेरेसको यो पहिलो भारत भ्रमण हो । उनले यसअघि अक्टोबर २०१८ मा पनि भारत भ्रमण गरेका थिए ।

भ्रमणको क्रममा महासचिव बिहीबार ‘मिसन लाइफ’ पर्यावरणका लागि जीवनशैली पुस्तिका, लोगो र ‘ट्यागलाइन’ को विमोचन कार्यक्रममा प्रधानमन्त्री नरेन्द्र मोदीसँग एक कार्यक्रममा सहभागी हुनेछन् ।

भारतीय विदेशमन्त्री एस जयशङ्करले महासचिव गुटरेससँग विश्वव्यापी चासोका मुद्दाका साथै संयुक्त राष्ट्रसङ्गसँग भारतको संलग्नतालाई अझ प्रगाढ बनाउने विषयमा छलफल गर्ने जनाइएको छ ।