काठमाडौं- अफगानिस्तानको राजधानी काबुलस्थित एक विद्यालयमा भएको विष्फोटनमा ६ जनाको मृत्यु भएको छ । काबुलको दस्त ए बराची क्षेत्रमा रहेको विद्यालयमा दुई वटा विष्फोट भएको काबुल प्रहरी प्रवक्तालाई उद्धृत गर्दै अन्तर्राष्ट्रिय समाचार संस्था एएफपीले जनाएको छ ।

विष्फोटबाट अरु ११ जना घाइते भएको जनाइएको छ । दस्त ए बरची क्षेत्रमा रहेको अब्दुल रहिम शहीद उच्च विद्यालयमा दुईवटा बम विष्फोट भएको प्रहरी प्रवक्ता खालिद जाद्रानले एएफपीलाई बताएका हुन् ।

‘यो प्रारम्भीक संख्या हो । हामी घटनाबारे थप विवरण संकलन गर्दैछौँ ।’ जाद्रानले भने । विद्यार्थीहरु बिहानको कक्षा सकेर विद्यालयबाहिर निस्कने बेला विष्फोट भएको बताइएको छ । त्यसबेला विद्यालयमा १ हजारभन्दा धेरै विद्यार्थीहरु रहेको प्रत्यक्षदर्शीलाई उद्धृत गर्दै एएफपीले जनाएको छ ।

यसबाहेक घटनास्थलबाट केही किलोमिटरको दूरीमा रहेको अर्को अंग्रेजी विद्यालयमा पनि विष्फोट भएको जनाइएको छ । यद्यपि तेश्रो विष्फोटको कारण र यसबाट भएको क्षतिको विवरण भने सार्वजनिक भइसकेको छैन ।

यसअघि एकै विद्यालयमा तीन विष्फोट भएको समाचार आएको थियो । आक्रमण भएको क्षेत्रमा अफगानिस्तानका अल्पसंख्यक शिया सम्प्रदायका हजारा जातीको बसोबास रहेको कतारी टेलिभिजन च्यानल अल जजीराले जनाएको छ ।

हालसम्म कुनै समूहले पनि आक्रमणको जिम्मा नलिएपनि अफगानिस्तानमा विगतमा आतंककारी संगठन इस्लामिक स्टेटले शियाहरुलाई लक्षित गर्दै आक्रमणहरु गराउँदै आएको छ ।