काठमाडौं– भारी वर्षा सँगैको बाढीका कारण व्यापक जनधनको क्षति भएपछि दक्षिण अफ्रिकाले उद्धार र राहत कार्यका लागि सेना परिचालन गरेको छ । दक्षिण अफ्रिकाको क्वाजुलु नटाल प्रान्तमा उद्धार तथा राहत कार्यका लागि दक्षिण अफ्रिकी फौज परिचालन गरिएको हो ।

दक्षिण अफ्रिकाको दक्षिण अफ्रिका राष्ट्रिय रक्षा बलले आफूहरुलाई यस कार्यका लागि १० हजार सैनिक परिचालन गर्न निर्देशन प्राप्त भएको बताएको छ ।

बीबीसीले जनाएअनुसार भारी वर्षापछिको बाढी र पहिरोमा परी हालसम्म ४ सय ४० भन्दा धेरैको ज्यान गइसकेको छ भने अरु दर्जनौं बेपत्ता छन् । प्रकोपको स्तरलाई मध्यनजर गर्दै दक्षिण अफ्रिका सरकारले राष्ट्रिय विपद्को घोषणा गरेको जनाइएको छ ।

सरकारी अधिकारीले यसलाई क्वाजुलु नटाल प्रान्तमा हालसम्मकै सबैभन्दा खराब प्रकोपको संज्ञा दिएका छन् । प्रान्तका प्रमुख शिहले जिकालालाले जानकारी दिएअनुसार ४ हजारभन्दा धेरै घट ध्वस्त भएका छन् भने अरु ८ हजार घरमा क्षति पुगेको छ ।

बाढीपछि दक्षिण अफ्रिकाका केही स्थानमा विद्युत, खानेपानी, औषधि, खाद्यान्न लगायतका अत्यावश्यक वस्तुको अभाव हुन थालेको बताइएको छ ।