कैलाली– धनगढीमा यही सोमवार सुरु हुने ‘मुख्यमन्त्री कप राष्ट्रिय पुरुष भलिबल प्रतियोगिता’ को ट्रफी र खेलतालिका आज सार्वजनिक गरिएको छ ।

आयोजक सुदूरपश्चिम प्रदेश खेलकुद परिषद्ले ट्रफी र खेल तालिका सार्वजनिक गरेको हो ।

परिषद्का सदस्य सचिव दीपकबहादुर सिंहले चैत १२ गतेसम्म सञ्चालन हुने प्रतियोगिताको उद्घाटन खेल लु्म्बिनी प्रदेश र विभागीय टोली त्रिभुवन आर्मीबीच हुने जानकारी दिएका छन् ।

सात प्रदेश र तीन वटा विभागीय गरी १० टोलीको सहभागिता रहने प्रतियोगिताको विजेताले चार लाख, उपविजेताले दुई लाख, तेस्रोले एक लाख र चौथो स्थान प्राप्त गर्नेले ५० हजार पुरस्कारसहित ट्रफी र मेडल प्राप्त गर्ने जनाइएको छ ।

प्रतियोगिताको सर्वोत्कृष्ट खेलाडीलाई २० हजार तथा उदयीमान खेलाडी, उत्कृष्ट लिफ्टर, उत्कृष्ट स्पाइकर, उत्कृष्ट ब्लकर, उत्कृष्ट डिफेन्सर, उत्कृष्ट सर्वर र उत्कृष्ट प्रशिक्षकलाई जनही १० हजारसहित पुरस्कृत गरिने आयोजकले जनाएको छ ।

प्रत्येक खेलका ‘म्यान अफ द म्याच’ लाई एक हजार ५०० प्रदान गरिने छ ।