काठमाडौं– रुसले युक्रेनमा पहिलो पटक हाइपरसोनिक क्षेप्यास्त्र प्रहार गरेको दाबी गरेको छ । रुसको इन्टरफ्याक्स समाचार संस्थाले युक्रेनमा पहिलो पटक किन्जल नामक हाइपरसोनिक क्षेप्यास्त्र प्रहार गरेको जनाएको हो ।

हाइपरसोनिक क्षेप्यास्त्र प्रहारबाट युक्रेनको पश्चिममा रहेको हतियार भण्डार केन्द्रलाई ध्वस्त बनाइएको दाबी गरिएको छ ।

‘हवाईब्यालिष्टिक प्रणालीको किन्जल हवाई क्षेप्यास्त्रले इभानो फ्रान्किभ्स्क क्षेत्रमा रहेको डेलियाटिन गाउँस्थित क्षेप्यास्त्र एवम् हवाई सैनिक उपकरण राखिएको भूमिगत भण्डारणलाई ध्वस्त बनाइदिएको छ ।’ रुसी रक्षा मन्त्रालयका प्रवक्ता इगोर कोनाशेन्कोभले भने ।

इभानो फ्रान्किभ्स्क क्षेत्रको ५० किलोमिटर सीमा नेटो सदस्य मुलुक रोमानियासँग जोडिएको छ । आवाजको वेगभन्दा १० गुण तीव्र गतिमा उड्ने किन्जल क्षेप्यास्त्रलाई रुसी राष्ट्रपति भ्लादिमिर पुटिनले ‘आदर्श हतियार’ को संज्ञा दिएका थिए ।

किन्जल हाइपरसोनिक क्षेप्यास्त्रलाई रुसले सन् २०१८ मा सार्वजनिक गरेको थियो ।