काठमाडौँ– उत्तर कोरियाले लामो दूरीको क्षेप्यास्त्र परीक्षण गरेको छ । उत्तर कोरियाले शुक्रबार अन्तरमहादेशीय ब्यालेस्टिक क्षेप्यास्त्र परीक्षण गरेको दक्षिण कोरियाली सेनाले जनाएको छ ।

यसअघि बिहीबारमात्र उत्तरले छोटो दूरीको क्षेप्यास्त्र परीक्षण गरेको बताइएको थियो । अन्तर्राष्ट्रिय समाचार संस्था रोयटर्सका अनुसार परीक्षण गरिएको क्षेप्यास्त्र जापानको तटबाट २ सय किलोमिटर टाढा गई खसेको थियो । जापानी अधिकारीहरुलाई उद्धृत गर्दै रोयटर्सले जनाएअनुसार यस क्षेप्यास्त्रले अमेरिकी मुख्यभूमिसम्म मार हान्ने क्षमता राख्दछ ।

एसिया प्रशान्त आर्थिक सहयोग एपेकको सम्मेलनका लागि थाइल्याण्ड भ्रमणमा रहेकी अमेरिकी उपराष्ट्रपति कमला ह्यारिसले उत्तर कोरियाली क्षेप्यास्त्र परीक्षणको निन्दा गरेकी छिन् । उनीसँगै दक्षिण कोरिया, क्यानाडा, जापान, अष्ट्रेलिया, न्युजिल्याण्डका नेताहरुले पनि क्षेप्यास्त्र परीक्षणको निन्दा गरेको रोयटर्सले जनाएको छ ।

पछिल्लो समय उत्तर कोरियाले आणविक परीक्षणको तयारी गरिरहेको बताइएको छ । उत्तर कोरियाले आणविक परीक्षण गरेको खण्डमा त्यसले कोरियाली प्रायद्विपमा थप अस्थीरता निम्त्याउने भन्दै चिन्ता उत्पन्न हुँदै आएको छ ।