काठमाडौँ- भारतले १५ सय किलोमिटरसम्म मार हान्न सक्ने ब्यालेस्टिक क्षेप्यास्त्रको डिजाइनलाई अन्तिम रुप दिएको छ । भारतको रक्षा अनुसन्धान एवम् विकास संस्था डीआरडीओले १५ सय किलोमिटरसम्म मार हान्न सक्ने क्षेप्यास्त्रको डिजाइनलाई अन्तिम रुप दिएको भारतीय अखबार हिन्दुस्तान टाइम्सको अनलाइन संस्करणले जनाएको छ ।

अब भारत सरकारले स्वीकृत गरेको खण्डमा यस क्षेप्यास्त्रको विकासको प्रक्रिया अघि बढ्ने जनाइएको छ । हालसम्म नामकरण नगरिएको यस क्षेप्यास्त्रले परम्परागत विस्फोटक पदार्थ बोक्नेछ । यस क्षेप्यास्त्रले जमिनबाट जमिनमा र जमिनबाट समुद्रमा मार हान्न सक्ने हिन्दुस्तान टाइम्सले जनाएको छ ।

भारतले जमिनबाट ५ हजार किलोमिटरसम्म मार हान्न सक्ने क्रुज एवम् ब्यालेस्टिक क्षेप्यास्त्र र समुद्रबाट ३५०० किलोमिटरसम्म मार हान्न सक्ने क्षेप्यास्त्रको विकास गरेपनि जमिनबाट जमिनमा एवम् जमिनबाट समुद्रमा मार हान्न सक्ने क्षेप्यास्त्रको विकास गरिसकेको छैन ।

नयाँ क्षेप्यास्त्रलाई चीनसँग सीमा जोडिएको मुलुकको उत्तरी क्षेत्र एवम् अरब सागर र बंगालको खाडीस्थित तटीय क्षेत्रमा तैनाथ गरिने अपेक्षा गरिएको छ ।