काठमाडाैँ- पाकिस्तानले दोस्रो ओडिआई खेलमा नेदरल्याण्ड्सविरुद्ध ७ विकेटको सानदार जित हात पारेको छ ।

नेदरल्याण्डमा भएको खेलमा कप्तान बाबर आजमसहित तीन ब्याटरको अर्धशतकमा पाकिस्तानले घरेलु टोलीलाई हराएको हो । योसँगै तीन ओडिआई खेलको सिरिज पाकिस्तानले एक खेल अगावै जितेको छ ।

जितको लागि १ सय ८७ रनको विजयी लक्ष्य पछ्याएको पाकिस्तानले ३३।४ ओभरमा ३ विकेट गुमाउँदै पूरा गर्यो । पाकिस्तानको जितमा मोहम्मद रिजवान ८२ बलमा ६ चौका र १ छक्कासहित सर्वाधिक ६९ रनमा अविजित रहे । सलमान अली अघा ३५ बलमा ५ चौका र २ छक्कासहित ५० रनमा अविजित रहे । उनको पहिलो ओडिआई अर्धशतक हो । नेदरल्यान्ड्सका भिभियन किंग्माले सर्वाधिक दुई विकेट लिए ।

त्यसअघि टस जितेर पहिला ब्याटिङ थालेको नेदरल्यान्ड्स ४४।१ ओभरमा १ सय ८६ रनमा अल आउट भयो । नेदरल्यान्ड्सका बास डि लिडेले १ सय २० बलमा २ चौका र ३ छक्कासहित सर्वाधिक ८९ रन बनाए । टम कपुरले ७४ बलमा ७ चौका र २ छक्कासहित ६६ रन बनाए ।

पाकिस्तानका हरिस रौफले ७।१ ओभरमा १६ रन खर्चेर ३ विकेट लिए । मोहम्मद नवाजले १० ओभरमा ४२ रन खर्चेर ३ विकेट लिए । नसिम साहले ६ ओभरमा २७ रन खर्चेर २ विकेट लिए । तेस्रो तथा अन्तिम खेल आइतबार हुनेछ ।