काठमाडौँ – शहिद स्मारक सी डिभिजन लिगमा पुलचोक स्पोर्ट्स क्लबले दोस्रो जित निकालेको छ ।

ललितपुरको सातदोबाटोस्थित एन्फा कम्प्लेक्समा बुधबार बिहान भएको खेलमा पुलचोकले वीरगंज स्पोर्ट्स एकेडेमीलाई ४–० गोल अन्तरले पराजित गरेको छ ।

पुलचोकको जितमा गोविन्द थापा, शाइर्‍याब लो तामाङ, सदाम मन्सुर र सागर पुनले १–१ गोल गरे । पुलचोकका जन्मजे धामी म्यान अफ द म्याच घोषित भए ।

आजको दोस्रो खेलमा प्लानिङ ब्वाईज युनाईटेड र आरसी ३२ फुटबल एकेडेमी दिउँसो पौने १ बजे आमने सामने हुनेछन् । आरसी ३२ सातौं जितको खाजीमा छ भने प्लानिङ चौथो जित निकाल्न चाहन्छ । १९ अंकसहित आरसी ३२ तालिकाको शीर्ष स्थानमा छ भने १३ अंकसहित प्लानिङ चौथो स्थानमा छ ।

आजको अन्तिम तथा तेस्रो खेलमा दिउँसो ४ बजे हुने खेलमा खालीबारी युथ फुटबल क्लब र महावीर क्लब भिड्नेछन् । दुवै खालीबारी र महावीर तेस्रो जितको खोजीमा छन् । १० अंकसहित खालीबारी सातौं स्थानमा छ भने ९ अंकसहित महावीर दशौं स्थानमा छ।