काठमाडौं– चीनका ३१ मध्ये २८ प्रान्तले यस वर्षको आर्थिक वृद्धिदर एवम् नीतिगत लक्ष्य कटौती गरेका छन् । चीनका २८ प्रान्तले अघिल्लो वर्षको तुलनामा चालु वर्ष सन् २०२२ मा कम आर्थिक वृद्धिदर हासिल गर्ने सम्भावनालाई मध्यनजर गर्दै आर्थिक वृद्धिदरको लक्ष्य घटाएका हुन् ।

हालै सार्वजनिक तथ्यांक अनुसार शाङ्हाई, बेइजिङ, गुआङडोङ जस्ता क्षेत्रमा अघिल्लो वर्षको तुलनामा यस वर्षको आर्थिक वृद्धिदरमा कमी आएको देखिएको थियो ।

यसबाहेक जारी रुस युक्रेन युद्ध र कोरोना भाइरसको बढ्दो प्रकोपका कारण विभिन्न शहरहरूमा लागू गरिएका लकडाउन र अरु नियन्त्रणात्मक प्रबन्धले गर्दा चीनले लक्ष्यअनुसारको आर्थिक वृद्धि हासिल गर्न नसक्ने अनुमान गरिएको छ ।

कमजोर आर्थिक वृद्धिले राष्ट्रपति सी जिन्पिङलाई अप्ठ्यारोमा पारेको हङ्कङ पोस्टले जनाएको छ । राष्ट्रपति सी यसै वर्ष आयोजना हुने कम्युनिष्ट पार्टीको २० औं महाधिवेशनमा अर्को कार्यकालका लागि पनि दाबेदारी दिने तयारीमा छन् ।

कोरोना भाइरसको असर, कार्बन उत्सर्जन कटौती गर्न दबाब र विश्व आपूर्ति व्यवस्थामा आएको गडबडी, बढ्दो बेरोजगारी समस्याले अर्थतन्त्रलाई पुनर्जागरण गर्ने सरकारी प्रयासमा गम्भीर आशंका उत्पन्न भएको हङ्कङ पोस्टले जनाएको छ ।

सन् २०२० को शुरुदेखि हालसम्म चीनमा स्थानीय सरकारको आर्थिक अवस्था झन् झन् कमजोर बन्दै गएको बताइएको छ । यसबाहेक बढ्दो बेरोजगारीका कारण युवापुस्तामा वर्तमान कम्युनिष्ट पार्टीको सरकारको लोकप्रियता पनि घट्दै जाने अनुमान गरिएको छ ।

(जीफाइभबाट)