काठमाडौँ– विश्वभर लागूऔषधजन्य अतंकवादको जोखिम बढेकोमा सरोकारवालाले चिन्ता व्यक्त गरेका छन् । लागूऔषधको आपूर्ति श्रृङ्खलामा अफगानिस्तान, पाकिस्तानजस्ता मुलुकको भूमिका, क्षेत्रीय आतंकवाद र धार्मिक अतिवादका कारण लागूऔषधजन्य आतंकवादको जोखिम बढेको पाइएको हो ।

इण्डोनेशियाबाट प्रकाशित हुने जकार्ता टाइम्सले जनाएअनुसार अफगानिस्तान र पाकिस्तान सीमा क्षेत्रमा जारी लागूऔषध तस्करी रोक्न दुबै मुलुकका प्रशासनले संघर्ष गरिरहेका छन् ।

यसबाहेक लागूऔषधको तस्करीले सो क्षेत्रमा सामाजिक एवम् कानूनी समस्या समेत देखा परेको जनइएको छ ।

गत वर्षको अगस्ट महिनामा तालिबानले शासन कब्जा गरेसँगै संसारमै सबैभन्दा धेरै अफिम उत्पादन गर्ने मुलुक अफगानिस्तानको अवस्थालाई लिएर चिन्ताहरु उत्पन्न हुँदै आएका छन् ।

अफगानिस्तानमा पूर्ववर्ती शासन ढलेसँगै विदेशमा रहेको पैसा रोक्का भएकाले अफिमलाई तालिबानले आयको स्रोतको रुपमा प्रयोग गर्नसक्ने बताइएको छ ।

सन् २०१९ मा अफिम उत्पादनले अफगानिस्तानको कूल ग्राहस्थ उत्पादनको ७ देखि ११ प्रतिशत हिस्सा ओगटेको थियो । पछिल्लो समय उक्त मुलुकमा उत्पन्न अस्थिरताले लागूऔषधको उत्पादन एवम् व्यापार ह्वात्तै बढेको जनाइएको छ ।

भारतीय समाचार संस्था एएनआईका अनुसार हालै उत्तर एटलान्टिक सन्धी संगठन नेटोले सार्वजनिक गरेको प्रतिवेदनमा अफगानिस्तानमा उत्पादन हुने लागूऔषध विश्वका ८४ प्रतिशत मुलुक पुग्ने गरेको उल्लेख छ ।