काठमाडौँ- आपराधिक ग्याङ्गको  क्रुर हिंसा, इन्धन अभाव र खाद्यवस्तुको बढ्दो मूल्य वृद्धिका कारण क्यारेबियन सागरमा अवस्थित मुलुक हाइटीको राजधानी पोर्ट–ओ–प्रिन्स ठप्प बनेको छ । संयुक्त राष्ट्रसंघका अनुसार हिंसामा करिब ९९ जनाले ज्यान गुमाएका छन् भने १३५ जना घाइते भएका छन् ।

बेलायती अखबार द गार्जियनका अनुसार राजधानी सहरको सिते सोलिल नामक न्यून आय भएको बस्ती छेउछाउमा दुई प्रतिद्वन्द्वी समूहबीचको रक्तपातपूर्ण लडाइँसँगै हिंसा भड्किएको हो ।

उक्त हिंसा छोटो समयमा नै चारैतिर फैलिएको बताइएको छ । अन्तर्राष्ट्रिय चिकित्सा सहायता संस्था डक्टर्स विदआउट बोडर्स (एमएसएफ) का अनुसार हाल त्यहाँ हजारौं मानिसहरु पिउने पानी, खाना वा चिकित्सकीय सेवाबाट बञ्चित छन् ।

नागरिकहरूलाई बचाउन सहायता संगठनले सशस्त्र समूहहरूसँग अनुरोध गरेको छ ।

संयुक्त राष्ट्र मानव अधिकार कार्यालयका प्रवक्ता जेरेमी लरेन्सले भने, ‘अधिकांश पीडितहरू प्रत्यक्ष रूपमा गिरोहमा संलग्न थिएनन् र उनीहरूलाई गिरोहले प्रत्यक्ष रूपमा लक्षित गरेको थियो । हामीले यौन हिंसाको नयाँ रिपोर्ट पनि प्राप्त गरेका छौँ ।’