कर्णाली : सुर्खेतको चिंगाड गाउँपालिकाको अध्यक्ष र उपाध्यक्ष पदमा नेकपा (एमाले)का उम्मेदवार विजयी भएका छन् । निर्वाचन अधिकृतको कार्यालयका अनुसार अध्यक्ष पदमा नेपाली कांग्रेसका डोरप्रसाद शर्मालाई ६१ अन्तरले पराजित गर्दै एमालेका बोधविक्रम जिसी विजयी भएका हुन् ।

अन्तिम मतपरिणामअनुसार जिसीले तीन हजार ५९१ र शर्माले तीन हजार ५३० मत प्राप्त गरे । उपाध्यक्ष पदमा एमालेकै मीनाकुमारी रोकाया विजयी भएकी छिन् । उनले तीन हजार ५८१ र निकटतम प्रतिद्वन्द्वी कांग्रेसकी मनमाया आचार्यले तीन हजार ४६९ मत प्राप्त गरे । मनमाया निवर्तमान उपाध्यक्ष थिइन् । 

छ वडामध्ये एमाले र कांग्रेसले तीन/तीन वडामा जित हासिल गरेका छन् । एमालेले वडा नं १, ४ र ५ तथा कांग्रेसले वडा नं २, ३ र ६ मा वडाध्यक्ष जितेका छन् । सुर्खेतका नौ स्थानीय तहमध्ये सबैभन्दा पहिला मत परिणाम सार्वजनिक भएको यो पहिलो गाउँपालिका हो ।