काठमाडौँ- महिला टी–ट्वान्टी क्रिकेट सिरिजमा नेपालले लगातार दोस्रो हार व्यहोरेको छ ।

काठमाडौँको कीर्तिपुरस्थित त्रिवि अन्तर्राष्ट्रिय क्रिकेट मैदानमा आज भएको खेलमा नेपाल युगान्डासँग १ विकेटले पराजित भएको हो ।

नेपालले दिएको १ सय २ रनको लक्ष्य युगान्डाले खेल सकिन एक बल अगाडि ९ विकेट गुमाएर भेट्टायो । 

नेपालका लागि सबनम राईले २ र कविता कुँवरले २ तथा सीता राना मगर र रुबिना क्षेत्रीले १–१ विकेट लिए ।

यसअघि टस हारेर ब्याटिङको निम्तो पाएको नेपालले निर्धारित २० ओभरमा ७ विकेट गुमाएर १ सय १ रन बनाएको थियो ।

नेपालका लागि विन्दु रावलले २६ र सरिता राना मगरले २२ रन बनाए । कप्तान रुबिना क्षेत्रीले १५ बलमा २ छक्का प्रहार गर्दै १७ रन जोडिन् ।

७ बलमा १ छक्कासहित डली भट्टले नटआउट ९ रन जोडिन् । 

सोमबार भएको पहिलो खेलमा नेपाल युगान्डासँग १२ रनले पराजित भएको थियो ।

५ खेलको टी–ट्वान्टी सिरिज अन्तर्गतको तेस्रो खेल बिहीबार, चौथो खेल शुक्रबार र पाँचौँ खेल शनिबार हुनेछ ।