काठमाडौँ – नेपालमै पहिलो पटक आयोजना हुन लागेको टेलिभिजन रियालिटी सोमा भिन्न भिन्न विधाका ट्यालेन्टलाई खोजिने भएको छ ।

विभिन्न प्रतिभालाई एकै मञ्चमा प्रस्तुत गर्ने उद्देश्यसहित सञ्चालन हुन लागेको ‘नेपाल ट्यालेन्ट हन्ट’को डिजिटल अडिसन सुरु भएको छ ।

सोमा भाग लिन चाहनेले डिजिटल अडिसनमार्फत सहभागिता जनाउन सक्ने छन् । यस रियालिटी सोमा कलाकारले गायन, नृत्य, अभिनय, कमेडी आदि विधामा आफ्नो प्रतिभा प्रस्तुत गर्न सक्ने आयोजकले जनाएको छ ।

अडिसनमा सहभागी हुन चाहने प्रतियोगीले १५ सेकेन्डदेखि ३ मिनेटसम्मको भिडियोमा आफ्नो प्रतिभा पठाउनुपर्नेछ । यसरी अडिसनपछि छानिने प्रतियोगीले क्रमशः आफूलाई अब्बल साबित गर्दै लैजानुपर्नेछ ।

निर्णायकमा गौरी मल्ल, रमेश उप्रेती, निशा अधिकारी र यम बराल रहनेछन् । साइना साहारा ग्रुपको प्रस्तुति यस सोका निर्माता टेकप्रसाद बास्तोला हुन् भने निर्देशकमा हरि शर्मा र प्रोग्राम हेडमा सहदेव कोइराला छन् ।

सोमा विजेता हुने प्रतियोगीले पचास लाख नगददेखि विभिन्न अवसर प्राप्त गर्नेछ । सम्बन्धित विधामा विजेता बन्ने प्रतियोगीले भने फिल्म, टेलिसिरियल, म्युजिक भिडियो आदिमा अवसर पाउनेछ।