काठमाडौं– पाकिस्तानका प्रधानमन्त्री शहबाज शरिफका छोरा हम्जा शरिफ पाकिस्तानको पञ्जाब प्रान्तको नयाँ मुख्यमन्त्री निर्वाचित भएका छन् ।

पञ्जाबको प्रान्तीय सभामा पाकिस्तान मुस्लिम लिग नवाज पीएलएमएन का नेता हम्जाले आफ्नो पक्षमा १ सय ९७ मत ल्याएर मुख्यमन्त्रीमा निर्वाचित भएको पाकिस्तानबाट प्रकाशित हुने डन अखबारको अनलाइन संस्करणले जनाएको छ ।

३ सय ७१ सिट रहेको पञ्जाब प्रान्तीय सभामा सरकार बनाउन १ सय ८६ सिट पर्याप्त हुन्छ ।

पूर्व प्रधानमन्त्री इमरान खान नेतृत्वको पाकिस्तान तहरिक–इ–इन्साफ (पीटीआई) पार्टीले चुनाव बहिष्कार गरेकाले हम्जाका प्रतिद्वन्द्वी परवेज इलाहीले कुनै मत प्राप्त गर्न सकेनन् ।

त्यसअघि संसद्‍मा पीटीआईका सदस्यहरूले होहल्ला गरेका थिए । प्रान्तीय सभामा पीटीआईका सदस्यहरूले उपसभामुख दोस्त मोहम्मद मजारीलाई हातपात गर्न खोजेपछि हंगामा समेत मच्चिएको बताइएको छ ।