जनकपुरधाम– फागुन १० गतेभित्रै कुर्था–जयनगर रेलसेवा यात्रुसहित सञ्चालन हुने भनिए पनि अझै अन्योल कायम छ ।

फागुन १ देखि ‘ड्राइरन’ (यात्रुबिना) रेल चलाउन सुरु गरिए पनि नियमित सञ्चालन अझै अन्योलमा परेको हाे ।

चैत सुरु भइसक्दा पनि नियमित रेल सञ्चालन हुने निश्चित नभएपछि ड्राई रनको समय पनि कटौती गरिएको  छ ।

कुर्था–जयनगर ओहोरदोहोेर गर्न दैनिक एक सय ३० लिटर डिजेल खर्च हुने गरेको छ । तर, यात्रुबिना नै रेल चल्ने भएपछि दैनिक खर्च बढेकोले खर्च कटौती गर्न अब महिनाको १५ दिन (ड्राइरन) गरिने नेपाल रेल्वे कम्पनीका महाप्रबन्धक निरञ्जन झाले जानकारी दिए ।

यता, रेल सञ्चालनका लागि माघमा विभिन्न पदमा ६५ कर्मचारी भर्ना गरिएको थियो । तर, रेल सञ्चालन नभए पनि उनीहरू अहिले बसेर नै तलब बुझ्ने गरेका छन् ।

‘प्राविधिक रूपमा सबै तयारी भइसकेको छ । कर्मचारी पनि नियुक्त भएर काममा खटिसकेका छन्,’ महाप्रबन्धक झाले भने, ‘भाडादर पनि निर्धारण भइसकेको छ । तर, रेलसम्बन्धी ल्याइएको अध्यादेश निष्क्रिय भएपछि नियमित सेवा दिने अझ अन्योलमा पर्ने देखिएको छ ।’

‘आम्दानी नभएसम्म लागत खर्च कम गर्ने उद्देश्यले एक दिन बिराएर रेल चलाउने छौँ,’ महाप्रबन्धक झाले भने, ‘सरकारले अध्यादेश पुनः ल्याउने तयारी पनि गरेको छ । कानुन नभएसम्म एकदिन बिराएर नै चलाउँछौँ ।’

यसअघि, महाप्रबन्धक झाले फागुन १० गतेभित्र रेल उद्घाटन हुन दाबी गरेका थिए ।