चितवन – चितवन राष्ट्रिय निकुञ्जमा दुई गैँडा मृत फेला परेका छन् ।

निकुञ्जको नवलपरासीस्थित कुजौली पोष्ट नजिकै माउ र बच्चा गैँडा मृत फेला परेको निकुञ्जले जनाएको छ ।

अन्दाजी २२ वर्षको पोथी गैँडा र चार महिनाको पोथी बच्चा पूर्वी नवलपरासीको सिसुवार मध्यवर्ती सामुदायिक वनमा मृत फेला परेको निकुञ्जले जनाएको छ । गैँडाको खाग र खुर सुरक्षित छन् ।

गैँडाको मृत्युको कारण खुलेको छैन । निकुञ्जका अधिकारीहरूले बाघको आक्रमणमा परी मरेको हो कि भन्ने अनुमान गरेका छन् ।

चालु आर्थिक वर्षमा चितवन राष्ट्रिय निकुञ्ज र आसपासका क्षेत्रमा २७ गैँडा मरेका छन् । तीमध्ये दुई वटा चोरी सिकारीले, एउटा मानवीय त्रुटिले र २४ वटा प्राकृतिक कारणले मरेका निकुञ्जले जनाएको छ ।