काठमाडौँ- पाकिस्तानमा ईश निन्दाको आरोपमा एकजना सुरक्षाकर्मी पक्राउ परेका छन् । पाकिस्तानको खैबर पख्तुनख्वा प्रान्तस्थित बट्टाग्राम जिल्लामा एकजना सुरक्षाकर्मीलाई ईश निन्दाको आरोपमा पक्राउ गरिएको हो ।

उनीमाथि जिल्ला प्रहरी कार्यालयमा भएको वादविवादका क्रममा इस्लामविरोधी अभिव्यक्ति दिएको आरोप लगाइएको छ ।

पाकिस्तानबाट प्रकाशित हुने डन अखबारको अनलाइन संस्करणका अनुसार उनलाई हिरासतमा राखिएको छ ।

यता संदिग्ध आरोपीले भने आफूले कुनै ईश निन्दा नगरेको स्पष्ट पार्दै घटनाबारे निष्पक्ष अनुसन्धान हुनुपर्ने माग गरेका छन् ।

पाकिस्तानमा ईश निन्दाको कानून निकै कठोर मानिन्छ । आलोचकहरु धार्मिक अल्पसङ्ख्यकहरुलाई दमन गर्न पाकिस्तानमा यस्तो कानूनको दुरुपयोग हुँदै आएको बताउने गरेका छन् ।

सन् २०२१ मा मात्रै पाकिस्तानमा ५८५ जनालाई ईश निन्दाको आरोपमा कारवाही गरिएको भारतीय समाचर संस्था एएनआईले जनाएको छ ।