काठमाडौँ- नेकपा एमालेका अध्यक्ष केपी शर्मा ओलीले चीनसँग पारवहन सम्झौता गरेबापत र चुच्चे नक्सा छापेबापत आफू दुईपटक सत्ताच्युत भएको टिप्पणी गरेका छन् । नेपाल चीन हिमालय मैत्री समाजद्वारा आयोजित एक कार्यक्रमा ओलीले यस्तो टिप्पणी गरेका हुन् ।

उत्तरतिरका १७ वटा भारतीय चेकपोस्ट हटाएबापत कीर्तिनिधि विष्टलाई प्रधानमन्त्रीबाट हटाइएको स्मरण गर्दै अध्यक्ष ओलीले उत्तरतिर पारवहन सम्झौता गरेबापत र चुच्चे नक्सा छापेबापत आफू दुवैपटक सत्ताच्युत भएको बताए ।

अध्यक्ष ओलीले २००७ सालदेखि २०१२ सालसम्म नेपालको सार्वभौमिकता सबैभन्दा कमजोर बनेको भन्दै अहिले त्यही अवस्था आएको समेत बताए । गठबन्धन सरकारले नेपालको स्वाधीनतालाई सत्तासँग सौदाबाजी गरेको पनि उनले आरोप लगाए ।

‘चुच्चे नक्सा छापेपछि यसमा सौदाबाजी हुने र त्यसका विरोधमा मानिसहरु लाग्ने गरेका एवम् अपवित्र साँठगाँठ समेत हुने आफूलाई पहिले नै थाहा भएको बताउँदै ओलीले त्यो थाहा भएरै उक्त निर्णय गरेको जिकिर गरे ।