काठमाडौँ- अफगानिस्तानमा अवकाशप्राप्त सरकारी कर्मचारीहरुले पेन्सन नपाएको भन्दै प्रदर्शन गरेका छन् । अफगानिस्तानमा शासन चलाइरहेको तालिबानले आफूहरुलाई पेन्सन उपलब्ध नगराएको भन्दै अवकाशप्राप्त कर्मचारीहरुले राजधानी काबुलमा प्रदर्शन गरेका हुन् ।

अफगानिस्तानको टोलो न्युजका अनुसार अवकाशप्राप्त कर्मचारीहरुले महिनौँदेखि पेन्सन पाएका छैनन् । कतिपय कर्मचारीको परिवारका लागि उनीहरुले पाउने पेन्सनमात्र आयको एकमात्र स्रोत रहेको बताइएको छ ।

अफगानिस्तानको अर्थ मन्त्रालयले अवकाशप्राप्त कर्मचारीहरुको समस्या समाधान गर्न प्रधानमन्त्री कार्यालयलाई पत्राचार गरेको टोलोले उल्लेख गरेको छ । अफगान अर्थ मन्त्रालयका प्रवक्ता अहमद वाली हकमलका अनुसार यसबारे मन्त्रिपरिषद्को बैठकमा प्रस्ताव राखिएको छ ।