सुर्खेत- दैलेखको ठाटीकाँध गाउँपालिका ३ खुड्खुडीका लालबहादुर आले मगर तीन घण्टाको पैदल यात्रा गरेर घट्ट पुग्थे । तीन घण्टाको बाटो हिँडेर घट्ट पुगे पनि उनले सितिमिति पालो पाउँदैनन् थिए । दुईदेखि चार दिन घट्ट कुरेर पिसेर घर फकिन्थे । बिहानको झिसमिसेमै टर्च बालेर मकै गहुँ पिस्न घट्ट पुग्ने उनका दिन अहिले फेरिएका छन् ।

उनीजस्तै ठाटीकाँध ३ विशाला माझखर्ककि मैनकला शाहीका दुःख पनि उस्तै थिए । बिहान भालेको डाँकोसँगै उठ्थिन् । कुम्लो कुटिरोसँग टर्च बालेर एक महिनालाई पुग्ने गहुँ पिस्न तीनदेखि चार घण्टाको बाटो हिँडेर रामघाट खोला पुग्थिन् । सितिमिति घट्ट पिस्ने पालो पाउँदैन थिइन् । तीन चार घण्टाको बाटो हिँडेर गए पनि पालो नपाउने समस्या थियो । घट्टमा घट्टेराहरुको भिड हुन्थ्यो ।

घट्ट पुग्ने बित्तिकै गहुँका बोराले घट्ट भरिभराउ हुन्थे । अगाडी पालो नपाउने कुराले मन खिन्न बनाउँदै बस्नुपरेको दिन ताजै रहेको अहिले  उनी सम्झिन्छिन्। लालबहादुर र मैनकला जस्तै यहाँका एक सय चार घर परिवारका समस्या उस्तै थिए । तर अहिले ती दिन फेरिएका छन् ।

ठाटीकाँध गाउँपालिका ३ खुड्खुडी आधुनिक घट्ट निर्माण योजना सम्पन्न भएपछि यहाँका एक सय चार घरधुरी परिवारका दिन बद्लिएका छन् । पहिले तीन चार घण्टा हिँड्ने बाटोमा अहिले आधा एक घण्टामै घट्ट पिस्न सकिन्छ  ।

उनका लागि त्यो समस्या टरेको छ । ठाटीकाँध गाउँपालिका र युएनडिपीको आर्थिक सहयोगमा खुड्खुडी आधुनिक घट्ट निर्माण योजना सम्पन्न भएपछि एक सय चार घर लाभान्वित भएका छन् । ठाटीकाँध गाउँपालिका र युएनडिपीको सहयोग गरी कुल पाँच लाख ७५ हजार एक २२ रुपैयाँमा निर्माण सम्पन्न भएको घट्ट बाहकोट, खुड्खुडी र माझ खर्क विशालाका नागरिकका लाभान्वित भएका छन् । जेठ ३१ बाट सञ्चालनमा आएको हो । घट्ट पिस्न आउने प्रति बोरा पिसेबापत पचास र ३० केजी पिसेबापत ३ कुरुवा लगेर कोषमा जम्मा गर्ने गर्ने गरेको आलेको भनाइ  छ ।