काठमाडौँ- स्टेट पार्टनरसीप प्रोग्राम (एसपीपी) मा सामेल हुन नेपालले दुईपटक निवेदन दिएको अमेरिकाले स्पष्ट पारेको छ ।

काठमाडौंस्थित अमेरिकी राजदूतावासका उपप्रमुख मानुएल मिकलरले आज दिउँसो केही पत्रकारहरुसँगको कुराकानीका क्रममा नेपालले एसपीपीमा सामेल हुन सन् २०१५ र २०१७ मा निवेदन दिएको जानकारी दिएका हुन् ।

नेपालले दुुई पटक निवेदन दिएपछि बल्ल अमेरिकाले सन् २०१९ मा अनुरोध स्वीकार गरेको स्पष्ट पारे । उनका अनुसार सन् २०१९ मा अमेरिकी राज्य युटाको नेशनल गार्डसँग सहकार्य गर्ने गरि उक्त अनुरोध स्वीकार गरिएको हो ।

अमेरिकाको तर्फबाट एसपीपीमा हस्ताक्षर गर्न नेपाललाई कुनै पनि दबाब नदिएको पनि उनले जनाए । एसपीसी नेपालको उत्तरी छिमेकी चीनविरुद्ध प्रयोग नहुने पनि उनले प्रस्ट पारे । २५ वर्ष अघि अस्तित्वमा रहेको र ९० मुलुकमा ८० भन्दा बढी सहकार्य भएको बताउँदै ती सबै मुलुकहरु यस क्षेत्रमा नरहेको पनि बताए ।

केहि सञ्चारमाध्यमहरुमा एसपीपीको बारेमा सार्वजनिक भएका दस्तावेजहरु गलत भएको उनको भनाइ छ । एसपीसी कार्यक्रम सुरक्षा र सैन्य गठबन्धन नरहेको उल्लेख गर्दै उपप्रमुख मिकलरले यसबाट द्विपक्षीय लाभ लिन सकिने बताए ।

उनले एसपीपीबाट अमेरिकाको द्विपक्षीय सम्बन्ध, जनस्तरको सम्बन्ध, कूटनीतिक संलग्नता, अन्तरसैनिक सहकार्य, व्यापार र समान विचारलाई बलियो हुने बताए । एसपीपीअन्तर्गत प्राकृतिक प्रकोप, विपद्, भूकम्प, बाढी, आगलागी जस्ता समस्या पर्दा तुरुन्त उद्धार गर्नको लागि अमेरिकी नेशनल गार्डसँग गृहकार्य गर्ने रहेको उनको भनाइ छ ।