काठमाडौँ– जोन अब्राहम अभिनीत फिल्महरूले पछिल्लो समय राम्रो व्यापार गर्न सकेको छैन ।

फिल्म उद्योगमा दुई दशक बिताइसकेका जोनले यस अवधिमा उनले थुप्रै सुपरहिट फिल्ममा अभिनय गरेका छन्, तर पछिल्लो समय उनी अभिनीत फिल्मले बक्स अफिसमा उत्साहजनक व्यापार गर्न सकेका छैनन् ।

जोन अभिनीत पछिल्लो फिल्म ‘अट्याक’ ले बक्स अफिसमा खासै राम्रो कलेक्सन गर्न सकेन । यसैले उनको फिल्म ओटीटी प्लेटफर्म जी फाइभमा रिलिज हुने भएको छ । 

ज्याकलिन फर्नान्डेज र कुल प्रीत सिंहको अभिनय रहेको फिल्मलाई जी फाइभ मे २७ मा हेर्न पाइने छ । जी फाइभले पछिल्लो समय एकपछि अर्को फिल्म रिलिज गरिरहेको छ । झुण्ड, द कश्मीर फाइल्स, आरआरआर पश्चात अट्याक रिलिज गर्न लागिएको हो ।

मे महिनामा मात्र जी फाइभ यी चार फिल्म प्रदर्शन गरेको हो । लक्ष्यराज आनन्द निर्देशित फिल्म अट्याकमा एक सैनिकको कथा देखाइएको छ । सेनाले देशलाई गर्ने माया नै फिल्मको मुख्य विषयवस्तु हो ।

यद्यपि फिल्मलाई दर्शकले हलमा भने खासै साथ दिएनन् । फलतः यो फिल्म पनि जोनको ‘फ्लप’ मा समावेश भयो ।