काठमडौं– उत्तर कोरियामा कोरोना भाइरस तीव्र गतिमा फैलिरहेका बेला दक्षिण कोरियाले यसको नियन्त्रणका लागि उत्तरसमक्ष वार्ताको प्रस्ताव गरेको छ ।

प्रकोपको नियन्त्रण गर्न उत्तर कोरियालाई सहयोग गर्ने विषयमा वार्ता केन्द्रित हुने दक्षिण कोरियाले जनाएको छ । यही साताको शुरुमै कार्य स्तरमा वार्ता शुरु हुनेगरी प्रस्ताव गरिएको नाम उल्लेख नगरिएका एकजना दक्षिण कोरियाली वरिष्ठ अधिकारीलाई उद्धृत गर्दै योन्हाप समाचार संस्थाले जनाएको छ ।

यही साताको शुरुमा कार्य स्तरमा वार्ता गर्नेबारे उत्तर कोरियासमक्ष औपचारिक प्रस्ताव पठाउने विषयमा सक्रिय रुपमा समीक्षा गरिरहेको छ ।’ ती अधिकारीले भने । अर्का एकीकरण मन्त्रालयका अधिकारीले उत्तर कोरियालाई व्यवहारिक सहयोग’ गर्ने विषयमा सक्दो छिटो प्रस्ताव गर्ने तयारी भइरहेको जनाएका छन् ।

उत्तर कोरियाले मुलुकमा गत बिहीबार कोरोना भाइरसका संक्रमित पहिलो पटक फेला परेको जनाएको थियो । त्यसयता प्रकोप व्यवस्थापनका लागि उत्तर कोरियाले १३ लाख ४० हजार जनालाई परिचालन गरेको योन्हापले जनाएको छ ।

दक्षिण कोरियामा युन सुक यिओलले नयाँ राष्ट्रपतिको कार्यकाल शुरु गरेसँगै दक्षिणले उत्तरलाई वार्ताको प्रस्ताव गरेको हो । गत शुक्रबार युनले उत्तर कोरियालाई कोभिड १९ खोप तथा अन्य औषधि सहायता उपलब्ध गराउने प्रस्ताव गरेका थिए ।