काठमाडौँ– नेपालले अमेरिकी अन्तर्राष्ट्रिय सहयोग नियोग यूएसएआईडी बाट करिब ८० अर्ब रुपैयाँको सहयोग पाउने भएको छ ।

बिहीबारको मन्त्रिपरिषद् बैठकको निर्णय आज सार्वजनिक गर्दै सरकारका प्रवक्ता तथा सञ्चार तथा सूचना प्रविधिमन्त्री ज्ञानेन्द्रबहादुर कार्कीले यूएसएआईडीमार्फत् आउने यो अनुदान रकम स्वीकार गर्ने निर्णय भएको जानकारी दिएका हुन् ।

अमेरिकी डलर ६ सय ५९ मिलियन अर्थात् करिब ७९ अर्ब ७१ करोड रुपैयाँ अनुदान प्राप्त हुन लागेको हो ।

यूएसएआईडीको यो अनुदान रकम चर्चित अमेरिकी मिलेनियम च्यालेन्ज कर्पोरेशन (एमसीसी) को सहयोगभन्दा पनि बढी हो ।

एमसीसीले पाँच सय मिलियन डलर अर्थात् करिब ६१ अर्ब रुपैयाँ अनुदान दिएको छ ।

एमसीसी र यूएसएआईडी दुवै अमेरिकी नियोगहरू हुन् ।

यूएसएआईडीले नेपालका स्वास्थ्य, शिक्षालगायत विभिन्न क्षेत्रमा सहयोग गर्दै आइरहेको छ ।