काठमाडौँ- गोकर्णेश्वर नगरपालिकाले नेपाली साहित्यिक क्षेत्रको विकासको लागि विशेष हास्य व्यंग्य कविता प्रतियोगिताको आयोजन गर्ने भएको छ ।

काठमाडौँको गोकर्णेश्वर नगरपालिकाले आज नेपाली साहित्यलाई लोभ हुन नदिन र लुकेर बसेका साहित्यकारलाई आफ्नो कलाको  प्रदर्शन गर्न आह्वान गर्दै प्रेस विज्ञप्ति जारी गरेको हो ।

नव वर्ष २०७९ को पूर्व सन्ध्यामा विशेष हास्य व्यंग्य कविता प्रतियोगिताको आयोजना हुने भएको छ । सहभागीहरुले  २०७८ साल चैत्र १० गते सम्ममा आफ्नो रचना पठाइ सक्नु पर्ने छ । रचनामा संविधान कानुन र कसैको चरित्र हत्या नहुने गरी र यस अघि कुनै पनि माध्यममा प्रकाशित नगरिएको हुनुपर्ने विज्ञप्तिमा उल्लेख गरिएको छ ।

 प्राप्त भएका कविताहरुको विज्ञद्धारा प्रारम्भिक मूल्याङ्कनका आधारमा विजेता छनोट गरिने छ । प्रतियोगिताको विजेतालाई ५० हजार, उप विजेतालाई ३० हजार र तेस्रोलाई २० हजार रुपैयाँ पुरस्कारको व्यवस्था गरिएको छ ।

यस्तै, ३ कवितालाई सान्त्वना पुरस्कारसहित १० हजार रुपैयाँको व्यवस्था पनि गरिएको छ । प्रतियोगिता सम्बन्धी थप जानकारी गोकर्णेश्वर नगरपालिकाको वेभ साइटबाट पनि लिन सकिने छ ।