काठमाडौं– मेक्सिकोमा रहेको अमेरिकी नियोगमा गोली प्रहार भएको छ । अमेरिकाको सीमानजिक रहेको मेक्सिकन शहर नुएभो लारेडोस्थित अमेरिकी नियोगमा गोली प्रहार भएको हो ।

स्थानीय आपराधिक ग्याङका नाइके हुआन जेरार्डो ट्रेभिनोलाई पक्राउ गरिएलगत्तै सो शहरमा हिंसात्मक घटना भएको जनाइएको छ । उनीमाथि लागूऔषध तस्करी, सम्पत्ति शुद्धिकरण, हत्या, आतंकवाद र अन्य अपराधको अभियोग लगाइएको र उनको अमेरिकातर्फ सुपुर्दगी समेत हुनसक्ने अन्तर्राष्ट्रिय सञ्चारमाध्यमले जनाएका छन् ।

नियोगमा गोली प्रहार भएपछि सोमबार केही समयका लागि नियोगको कार्यालय बन्द समेत गर्नुपरेको जनाइएको छ ।

सामाजिक सञ्जाल ट्विटरमा सन्देश जारी गर्दै उक्त नियोगले सो क्षेत्रमा आकस्मिक घटनाको विकास भएको भन्दै अमेरिकी नागरिकलाई सुरक्षित रहन समेत आह्वान गरेको छ ।

ग्याङका नाइकेलाई गिरफ्तार गरेपछि उनका समर्थकरुले शहरमा हिंसा मच्चाएको र घटनामा एक जनाको मृत्यु भएको रोयटर्सले जनाएको छ ।