काठमाडौँ- कोरोना भाइरस महामारीको प्रभाव कम भए लगत्तै चलचित्र निर्देशक समाजले सक्रियता बढाएको छ । मोफसलबाट पनि फिल्ममा दक्ष जनशक्ति तयार गर्ने उदेश्य सहित निर्देशक समाज ‘आधारभूत फिल्म निर्माण कार्यशाला’ गरिरहेको छ । समाजले चलचित्रकर्मी महासंघ प्रदेश १ र चलचित्र विकास बोर्डसँग सहकार्यमा हालै ५ दिने ‘आधारभूत फिल्म निर्माण कार्यशाला’ सम्पन्न गरेको छ ।

धरानको हरियाली सामुदायिक वनको सभाहलमा सम्पन्न कार्यशालामा लेखन देखि बजारीकरणसम्मका कक्षा सञ्चालन भएको समाजका महासचिव जनकदीप पराजुलीले बताए । उनले केहि समय अगाडी सम्पन्न बाराको निजगढमा गरेको कार्यक्रम बाँकी प्रदेशमा पनि विस्तार गर्ने लक्ष्य अनुरुप धरानमा कार्यशालाको आयोजना गरेको बताए ।

‘बारा निजगढमा गरिएको कार्यक्रमले फिल्मकर्मी बीच अत्यन्त उत्साह सञ्चारित भएको महसुस गर्यौँ । हामीले यस्ता कार्यक्रम मार्फत सिधै फिल्मकर्मी तयार गर्ने भन्दा पनि यो विधामा थप अध्ययनका लागि उत्प्रेरित गर्ने उद्देश्य राखेका छौँ’ महासचिव पराजुलीले भने ।

चलचित्रकर्मी महासंघ प्रदेश १ का अध्यक्ष अरुण प्रधानले मोफसलका फिल्म र फिल्मकर्मीको अस्तित्व दरिलो बनाउने अभिप्रायले कार्यशालाको आयोजना गरिएको बताए ।

प्रशिक्षणमा प्रदेश १ का १४ जिल्लाका ५० बढी प्रशिक्षार्थीको सहभागिता रहेको थियो । प्रशिक्षणमा नीर शाह, युवराज लामा, राजकुमार राई, प्रकाश सायमी, दीपाश्री निरौला, रक्षा सिंह राणा, भोला सापकोटा, जनकदीप पराजुली, पुरुषोत्तम प्रधान, सामीप्यराज तिमल्सेना आदिले विविध विषयमा प्रशिक्षण दिएका थिए ।