काठमाडौँ- टर्कीको इस्तानबुलमा भएको आक्रमणमा आतङ्ककारीहरुको हात रहेको राष्ट्रपति रिसेप तैयप एर्दोगानले बताएका छन् ।

आइतबार इस्तानबुलमा आयोजित एक पत्रकार सम्मेलनमा उनले यो कार्य आतङ्ककारीहरुबाट भएको बताएका हुन् । उनले भने, ‘अहिले नै यसो भन्न त हतार हुनसक्छ, त्यसैले मैले सय प्रतिशत नै आतङ्ककारी हमला त भन्न सक्दिन, तर पनि यो काम आतङ्ककारीकै हो भन्ने हाम्रो प्रारम्भिक अनुसन्धानले देखाएको छ ।’

उनले जी २० को सम्मेलनमा सहभागी हुन इन्डोनेसिया जानुअघि इस्तानबुलमा आयोजित पत्रकार सम्मेलनमा यस्तो टिप्पणी गरेका हुन् ।

उनले यो आक्रमणको अनुसन्धान जारी नै रहेको तर अहिलेसम्मको अवस्था हेर्दा कुनै एकजना महिलाले आत्मघाती हमला गराएको जस्तो देखिएको पनि बताए ।

टर्कीको इस्तानबुल सहरमा आइतबार अपराह्न बम आक्रमण भएको थियो । अज्ञात व्यक्तिबाट भएको सो हमलामा परेर कम्तीमा पनि छ जनाको ज्यान गएको छ भने अरु ५३ जना घाइते भएका छन् ।