दोहा – साउदी अरबमा रहेका नेपालीलाई राहदानी बनाउन प्रि–इनरोलमेन्ट अनिवार्य गरिएको छ।  रियादस्थित नेपाली दूतावासका अनुसार राहदानी नवीकरणको लागि अनिवार्यरूपमा अनलाइन फाराम भर्नुपर्ने छ।

‘अनलाइन फाराम भर्दा केही त्रुटिहरू भएको पाइएको छ। त्यसलाई सुधार गर्नुपर्ने खाँचो देखियो। राहदानी र नागरिकताको राम्रो क्वालिटी स्क्यान गरेर मात्रै अपलोड गर्नुहोला। आफ्नो नाम र थर लेख्दा ठिकसँग लेख्नुहोस् र आफ्नो स्थानीय निकायको नाम र वडा नं सही लेख्नुहोस्। अरू विवरणमा पनि कुनै त्रुटि हुन नदिनुहोस्।’ दूतावासले प्रकाशन गरेको सूचनामा भनिएको छ।

अनलाइन फाराम भरिसकेपछि त्यसलाई प्रिन्ट गरेर अन्य आवश्यक कागजातसँगै लिएर आउन भनिएको छ।  राहदानी नवीकरणको लागि अनलाइन फाराम आफैँ भर्ने वा आफ्नो कम्पनीको सहयोग लिएर भर्ने वा आफ्ना साथीभाइ/अन्य कसैको सहयोग लिएर भर्ने वा नेपालमा रहेका आफ्ना साथीभाइ वा परिवारको मदत लिएर भर्ने वा अरू कसैलाई लगाएर भराउन सकिने दूतावासले जनाएको छ।

अनलाइन फाराम नभरीकन वा प्रि-इनरोलमेन्ट नगरी आउने सेवाग्राहीको राहदानी नवीकरण आवेदन लिन दूतावास बाध्य नहुने जनाएको छ। यो नियम लागू भए दूतावासको अहिले कै श्रोत साधनले अहिले भन्दा छिटो र धेरै सेवाग्राहीलाई सेवा दिन सकिने जनाइएको छ।