काठमाडौँ– पाकिस्तानको राजधानी इस्लामावादका सडकमा आपराधिक प्रवृत्तिका घटनामा वृद्धि हुन थालेको पाइएको छ । राजधानी सहरमा लुटपाट, चारी र डकैतीको घटनामा उल्लेख्य वृद्धि भएको पाइएको हो ।

भारतीय समाचार संस्था एएनआईका अनुसार इस्लामावादमा मात्रै यो वर्षको पहिलो ५ महिनामा ५ हजार ४ सय ६६ वटा अपराधका उजुरी दर्ता भएका छन् ।

अघिल्लो वर्षको यही अवधिमा केबल १ हजार ९ सय ३४ वटा अपराधका घटना दर्ता भएको पाकिस्तानबाट प्रकाशित हुने डन अखबारले जनाएको छ ।

यीमध्ये इस्लामावादमा १ हजार ४८ वटा लुटपाटका घटना दर्ता गरिएका छन् । अघिल्लो वर्षको यही अवधिमा इस्लामावादमा केबल ३९९ वटा मात्रै लुटपाटका घटना दर्ता गरिएका थिए ।

यसबाहेक यही अवधिमा इस्लामावादमा ७५ वटा हत्या, १४६ वटा हत्या प्रयासको उजुरी पनि दर्ता गरिएको छ ।