काठमाडौँ– सत्तारुढ गठबन्धनको तर्फबाट नेपाली कांग्रेसकी सचेतक पुष्पा भुसाल गौतमले उपसभामुख पदमा उम्मेदवारी दर्ता गराएकी छन् । संघीय संसद् भवन नयाँ बानेश्वरमा पुगेर उनले उपसभामुखको उम्मेदवारी दर्ता गराएकी हुन् ।

सो उम्मेदवारीमा नेकपा (माओवादी केन्द्र) का प्रमुख सचेतक देवप्रसाद गुरुङ प्रस्तावक र नेकपा (एकीकृत समाजवादी) का लक्ष्मीकुमारी चौधरी समर्थक छन्।

सत्तारुढ गठबन्धनकातर्फबाट साझा उम्मेदवारका रुपमा गौतमको उम्मेदवारी परेको हो । सभामुख र उपसभामुख एउटै पार्टीबाट बन्न नपाइने संवैधानिक व्यवस्थाअनुसार उपसभामुख पद कांग्रेसले पाएको हो। 

अहिले नेकपा माओवादीका अग्निप्रसाद सापकोटा सभामुख छन् । गठबन्धनमा रहेका दलहरुबाट भुसालको उम्मेदवारी परे पनि विपक्षी दलबाटसमेत उम्मेदवारी दिन पाइनेछ ।

मतदान भने भोलि हुनेछ । लामो समयदेखि प्रतिनिधिसभाको उपसभामुख पद रिक्त रहँदै आएको थियो ।