काठमाडौं– लडाकु विमानवाहक युद्धपोत आईएनएस विक्रान्तका लागि २६ लडाकु विमान खरिद गर्ने भएको छ । आफ्नै मुलुकमा उत्पादन हुने लडाकु विमान भारतीय नौसेनामा तैनाथ हुन अझै दशक लाग्नसक्ने भएकाले तत्कालका लागि भारतले २६ लडाकु विमान खरिद गर्न लागेको भारतीय अखबार हिन्दुस्तान टाइम्सले जनाएको छ ।

भारतीय नौसेनाको आगामी लडाकु विमानवाहक युद्धपोत विक्रान्तका लागि भारत सरकारले अन्तर सरकारी सम्झौता (जीटुजी) प्रक्रियामार्फत् २६ लडाकु विमान खरिद गर्न लागेको जनाइएको छ ।

यसका लागि फ्रान्सेली लडाकु विमान रफायल मरिनले गत जनवरीमा भारतको गोवामा रहेको नौसैनिक अखडामा परीक्षण उडान गरेको हिन्दुस्तान टाइम्सले जनाएको छ ।

त्यस्तै, अमेरिकी लडाकु विमान एफ १८ सुपर होर्नेटको परीक्षण उडान बुधबार सम्पन्न हुने जनाइएको छ ।

२६ मध्ये भारतीय नौसेनालाई ८ वटा दुई इन्जिन भएका प्रशिक्षण लडाकु विमान पनि आवश्यक रहेको हिन्दुस्तान टाइम्सले उल्लेख गरेको छ । यी प्रशिक्षण लडाकु विमानलाई आवश्यक परेको समयमा युद्धमैदानमा पनि प्रयोग गरिने बताइएको छ ।

आइएनएस विक्रान्तलाई यो वर्षको स्वतन्त्रता दिवस अर्थात् १५ अगष्टमा नरेन्द्र मोदीले औपचारिक रुपमा भारतीय नौसेनामा तैनाथ गर्ने अपेक्षा गरिएको छ ।