काठमाडौँ – काठमाडौँ महानगरको मतगणना सुरु भएको छ। सर्वपक्षीय बैठक बसेपछि मतगणना सुरु भएको हो ।

सुरुमा मतगणनाका लागि वडा नम्बर १ बाट र वडा नम्बर ३२का बाकस खोलिएको छ । स्थानीय तह निर्वाचनमा काठमाडौँको मेयरका लागि ५५ जना चुनावी प्रतिस्पर्धामा छन् ।

निर्वाचन अधिकृतको कार्यालय राष्ट्रियसभा गृहमा मतगणना सुरु भएको हो । निर्वाचन अधिकृत प्रेमकुमार श्रेष्ठका अनुसार वडा नम्बर १ र ३२ बाट गणना सुरु भएको हो । केहीबेरमा गणनास्थल थप गरिने उनले बताए।

काठमाडौँ महानगरका १५६ मतदान स्थलका ३६३ मतदान केन्द्रबाट शुक्रबार मतदान भएको थियो । यहाँ ३ लाख २४२ मतदाता छन् ।शुक्रबार सम्पन्न निर्वाचनमा महानगर क्षेत्रमा ६३.४९ प्रतिशत मत खसेको थियो ।