जनकपुरधाम– मधेश प्रदेशका आन्तरिक मामिला तथा सञ्चारमन्त्री भरतप्रसाद साहले अध्यादेश ल्याएरै भए पनि प्रदेशमा प्रहरी भर्ना गर्ने चेतावनी दिएका छन् ।

जनकपुरधाममा बिहीबार नयाँ वर्षको शुभकामना दिने क्रममा मन्त्री साहले संघ सरकारले प्रहरी समायोजन नगरे स्थानीय चुनावपछि अध्यादेश ल्याएरै भए पनि प्रहरी भर्ना प्रक्रिया अघि बढाउने चेतावनी दिएका हुन् ।

उनले वैशाख ३० गतेभित्र प्रहरी समायोजन गर्न संघ सरकारलाई अल्टिमेटम पनि दिएका छन् ।

मन्त्री साहले तीनवटै तहबीचको सम्बन्ध सुमधुर होस् र संविधानले दिएको अधिकार सुनिश्चित होस् भन्ने आफूहरूले अपेक्षा राखेको पनि बताए ।

उनले विधेयक ल्याउँदा बढी समय लाग्ने भएकाले अध्यादेशमार्फत नै अगाडि बढ्ने बताए ।

मन्त्री साहले कर्मचारीको अभावका कारण आफूहरूले राम्ररी काम गर्न नपाएको पनि बताएका थिए ।