काठमाडौं– फिनल्याण्ड र स्विडेनले नेटोको सदस्यता लिएको खण्डमा आणविक युद्धको खतरामा उच्च वृद्धि हुने रुसले चेतावनी दिएको छ ।

रुसका पूर्व राष्ट्रपति एवम् राष्ट्रिय सुरक्षा परिषद्का उपप्रमुख दिमित्री मेद्भेदेभले ती मुलुकले नेटोको सदस्यता लिएको खण्डमा ‘आणविक हतियार रहित बाल्टिकको कुरै नउठ्ने’ टिप्पणी गरेका हुन् । सामाजिक सञ्जाल टेलिग्राममा सन्देश जारी गर्दै मेद्भेदेभले सीमाको सुरक्षा पनि मजबुत बनाइने बताए । उनले रुसले सीमा क्षेत्रमा ‘सुरक्षाबल र हवाई प्रतिरोधी प्रणालीको गम्भीर सबलीकरण गर्ने र फिनल्याण्डको खाडीमा उल्लेखनीय मात्रामा नौसैनिक बल परिचालन गरिने’ जनाएका हुन् ।

रुसले गत फेब्रुअरी २४ मा युक्रेनमाथि आक्रमण गरेयता फिनल्याण्ड र स्विडेनमा नेटोको सदस्यता लिने पक्षमा जनमत मजबुत रहेको बताइएको छ । बेलायती टेलिभिजन च्यानल स्काई न्युजको अनलाइन संस्करणका अनुसार मेद्भेदेभको टिप्पणीको जवाफमा बाल्टिक मुलुक लिथुएनियाका रक्षामन्त्री अर्भिदास अनुसउस्कासले बाल्टिक क्षेत्रमा यसअघि नै रुसी आणविक हतियार रहेको बताएका छन् ।

बीएनएस समाचार संस्थालाई दिएको अन्तरवार्तामा रक्षामन्त्री अनुसउस्कासले युक्रेनमाथि आक्रमण गर्नुअघि नै बाल्टिक क्षेत्रमा रहेको रुसी भूमि कालिनिन्ग्रादमा आणविक हतियार परिचालित रहेको बताए । बाल्टिक समुद्रको किनारमा रहेको कालिनिन्ग्राद क्षेत्रको सीमा नेटो सदस्य मुलुकहरू पोल्याण्ड र लिथुएनियासँग जोडिन्छ ।

‘रुसले अहिले दिएको धम्की अचम्म लाग्दो छ, हामीलाई थाहा छ वर्तमान सुरक्षा अवस्थाको विकास हुनुअघि नै उनीहरुले लिथुएनियाको सीमाबाट १ सय किलोमिटरमा हतियार परिचालन गरेका छन् ।’ उनले भने, ‘कालिनिन्ग्रादमा पहिलेदेखि नै आणविक हतियार राखिएको छ । अन्तर्राष्ट्रिय समुदाय, क्षेत्रीय मुलुकहरुलाई यसबारे राम्रो जानकारी छ । उनीहरुले यसलाई धम्कीको रुपमा प्रयोग गरिरहेका छन् ।’

बुधबार स्विडेनकी प्रधानमन्त्री मगदलाना एण्डरसन र फिनल्याण्डकी प्रधानमन्त्री सन्ना मारिनले स्विडेनको राजधानी स्टकहोममा संयुक्त पत्रकार सम्मेलनको आयोजना गरेका थिए । सो अन्तरवार्तामा मारिनले आगामी केही साताभित्र फिनल्याण्ड नेटोमा सहभागी हुनेबारे निर्णय गरिने बताएकी थिइन् ।