काठमाडौँ- नेकपा एमालेका नेता भीम रावलले प्रधानमन्त्री शेरबहादुर देउवाले एमसीसीबारे आफूमाथि लगाएको आरोपप्रति आपत्ति जनाएका छन् । प्रधानमन्त्री देउवाको भनाइ आए लगत्तै ट्वीट गर्दै रावलले उक्त भनाइप्रति असहमति जनाएका हुन् ।

प्रधानमन्त्री देउवाले सोमबार नुवाकोटमा आयोजित कार्यक्रममा रावल मन्त्री भएकै बेला एमसीसी सम्झौता मन्त्रिपरिषदबाट पारित भइ संसदमा पेश भएको तर, त्यतिबेला रावलले कुनै प्रतिक्रिया नदिएर अहिले किन टाउको दुखाएको भनि प्रश्न गरेका थिए ।

जवाफमा रावलले आफू मन्त्री भएका बेला मन्त्रिपरिषदबाट एमसीसी पारित नभएको जिकिर गरेका छन् । उनले आफु केपी ओलीजी पहिलो पटक प्रधानमन्त्री भएको बेला उपप्रधानमन्त्री र रक्षामन्त्री भएको तर, ओलीले एमसीसीसँगको सम्झौता संसदमा ल्याएको बेला आफु मन्त्री नभएको दाबि गरेका छन् । प्रधानमन्त्रीको यो अभिव्यक्ति झुटो भएको बताउँदै रावलले उल्टै प्रधानमन्त्रीकै दिमाग खुस्केको टिप्पणी गरेका छन् ।

उनले एमसीसी सम्झौता देशको हितमा नरहेकाले राष्ट्रको हित र अस्मिताप्रति चिन्तित भएर आफ्नो टाउको दुखेको पनि प्रष्टीकरण दिएका छन् । नेता रावलले देउवाले संसद नियमावली र संविधान मिचेर, जनआवाजमाथि दमन गरेर बाह्य शक्तिलाई रिझाउन होहल्लाका बीच एमसीसी अनुमोदन गराएको टिप्पणी गरेका छन् ।

उनले थप बहस गर्ने इच्छा भए बहस गर्न प्रधानमन्त्री देउवालाई चुनौती पनि दिएका छन् ।

प्रमं देउवाले नुवाकोटमा मेरो बारेमा दिएको अभिव्यक्ति कति झुठा र उदण्डतापूर्ण छ, तथ्य हेरौं : pic.twitter.com/7aoA854K9I

— Dr. Bhim Rawal (@BhimRawal179) March 14, 2022