काठमाडौँ– अफागानिस्तानमा शासन चलाइरहेको तालिबानले अध्ययनका लागि विदेश जान चाहने महिला विद्यार्थीलाई अनुमति नदिने गरेको पाइएको छ ।

रुसी समाचार संस्था स्पुत्निकका अनुसार अध्ययनका लागि कतार, कजाखस्तानजस्ता मुलुक जान चाहने महिला विद्यार्थीलाई तालिबानले अनुमति दिन अस्वीकार गरेको हो ।

यद्यपि विदेश जान चाहने पुरुष विद्यार्थीले भने तालिबानबाट यस्तो अनुमति पाउने गरेका छन् ।

यसबाहेक तालिबानले अफगानिस्तानभित्रै पनि महिलाहरुलाई अध्ययनबाट बञ्चित गर्दै आएको छ । मुलुकका विद्यालयहरुमा महिला र पुरुषलाई बेग्लाबेग्लै राखेर पढाई हुँदै आएको छ भने छात्राहरुलाई ६ कक्षाभन्दा माथि अध्ययन गर्ने अनुमति छैन ।

यतिमात्रै नभई तालिबानको शासनकालमा महिला अधिकार कटौती भएको भन्दै विभिन्न अन्तर्राष्ट्रिय मानवअधिकारवादी संस्थाहरुले समेत चर्को आलोचना गर्दै आएका छन् ।