काठमाडौँ- नेकपा एमालेका अध्यक्ष केपी ओलीले स्थानीय तहको निर्वाचनमा राज्य पक्षबाट मानवअधिकार हननका घटना भएको बताएका छन्।

मानवअधिकार एलायन्सले बुधबार काठमाडौँमा आयोजना गरेको कार्यक्रममा अध्यक्ष ओलीले निर्वाचनमा विपक्षी दलका उम्मेदवारलाई गिरफ्तार गर्ने र हिरासतमा राख्ने लगायतका मानवअधिकार विरोधी काम राज्य पक्षबाट भएको बताएका हुन् ।

विपक्षीलाई थुनाएर बुथ कब्जा गर्ने काम पनि भएको उनको भनाइ छ । ओलीले रेडक्रसमा अदालतको आदेश विपरीत प्रहरी पठाएर तमासा गर्न खोजेको र डेमोक्रेशी र कानूनी राजको उपहास भएको तर्क गरे। अध्यक्ष ओलीले आफ्नो अहिलेसम्मको लडाई मानवअधिकारका लागि नै भएको र कहिले पनि मानवअधिकारको उलङ्घन नगर्ने स्पष्ट पारे।

उनले मानवअधिकार जागिर नभएको र यो नितान्त आदर्श र निष्ठासँग जोडिएको विषय भएको बताए।