काठमाडौँ– उत्तर कोरियामा एकजना कोभिड संक्रमितको मृत्यु भएको छ । 

उत्तर कोरियाली सरकार नियन्त्रित समाचार संस्था केसीएनएले एकजना कोभिड–१९ सङ्क्रमितको मृत्यु भएको शुक्रबार पुष्टि गरेको हो । उत्तर कोरियाले कोभिड–१९ बाट आफ्नो मुलुकमा भएको पहिलो मृत्युको पुष्टि गर्दै ज्वरो विस्फोटक रूपमा राष्ट्रव्यापी रूपमा फैलिरहेको र हजारौं मानिसहरू बिरामी भएपछि अलग्गै अलग्गै राखी उपचार भइरहेको बताएको छ ।

उत्तर कोरियाले बिहीबार मात्र पहिलो कोरोना संक्रमित फेला परेको जनाएको थियो । केसीएनएका अनुसार राजधानी प्योङयाङका बिरामीमा सङ्क्रमण पाइएका थिए । फेला परेका सङ्क्रमण कोभिडको ओमिक्रोन भरेरिएन्ट भएको पनि समाचारमा जनाइएको छ  । 

यो सङ्क्रमण पाइएपछि यहाँको सरकारले यसलाई राष्ट्रिय सङ्कटको अवस्था भनेको पनि सो समाचार समितिले जनाएको  छ   ।